Find this Story

Print, a form you can hold

Wireless download to your Amazon Kindle

Look for a summary or analysis of this Poem.

Enjoy this? Share it!

Rantin’, Rovin’ Robin
by [?]


Tune–“Daintie Davie.”

There was a lad was born in Kyle,
But whatna day o’ whatna style,
I doubt it’s hardly worth the while
To be sae nice wi’ Robin.

Chor.–Robin was a rovin’ boy,
Rantin’, rovin’, rantin’, rovin’,
Robin was a rovin’ boy,
Rantin’, rovin’, Robin!

Our monarch’s hindmost year but ane
Was five-and-twenty days begun [1],
‘Twas then a blast o’ Janwar’ win’
Blew hansel in on Robin.
Robin was, etc.

The gossip keekit in his loof,
Quo’ scho, “Wha lives will see the proof,
This waly boy will be nae coof:
I think we’ll ca’ him Robin.”
Robin was, etc.

“He’ll hae misfortunes great an’ sma’,
But aye a heart aboon them a’,
He’ll be a credit till us a’–
We’ll a’ be proud o’ Robin.”
Robin was, etc.

“But sure as three times three mak nine,
I see by ilka score and line,
This chap will dearly like our kin’,
So leeze me on thee! Robin.”
Robin was, etc.

“Guid faith,” quo’, scho, “I doubt you gar
The bonie lasses lie aspar;
But twenty fauts ye may hae waur
So blessins on thee! Robin.”
Robin was, etc.

1785

[Footnote 1: January 25, 1759, the date of my bardship’s vital existence.–R.B.]