FullReads

“Thank ye kindly, Marget; thae are gude words an’ true, an’ ye hev the richt tae say them; but a’ canna dae without seein’ Annie comin’ tae meet me in the gloamin’, an’ gaein’ in an’ oot the hoose, an’ hearin’ her ca’ me by ma name; an’ a’ ‘ll no can tell her that a’ luve her when there’s nae Annie in the hoose.

“Can naethin’ be dune, doctor? Ye savit Flora Cammil, and young Burnbrae, an’ yon shepherd’s wife Dunleith wy; an’ we were a’ sae prood o’ ye, an’ pleased tae think that ye hed keepit deith frae anither hame. Can ye no think o’ somethin’ tae help Annie, and gie her back her man and bairnies?” and Tammas searched the doctor’s face in the cold, weird light.

“There’s nae pooer in heaven or airth like luve,” Marget said to me afterward; “it mak’s the weak strong and the dumb tae speak. Oor herts were as water afore Tammas’s words, an’ a’ saw the doctor shake in his saddle. A’ never kent till that meenut hoo he hed a share in a’body’s grief, an’ carried the heaviest wecht o’ a’ the Glen. A’ peetied him wi’ Tammas lookin’ at him sae wistfully, as if he hed the keys o’ life an’ deith in his hands. But he wes honest, and wudna hold oot a false houp tae deceive a sore hert or win escape for himsel’.”

“Ye needna plead wi’ me, Tammas, to dae the best a’ can for yir wife. Man, a’ kent her lang afore ye ever luved her; a’ brocht her intae the warld, and a’ saw her through the fever when she wes a bit lassikie; a’ closed her mither’s een, and it wes me hed tae tell her she wes an orphan; an’ nae man wes better pleased when she got a gude husband, and a’ helpit her wi’ her fower bairns. A’ ‘ve naither wife nor bairns o’ ma own, an’ a’ coont a’ the fouk o’ the Glen ma family. Div ye think a’ wudna save Annie if I cud? If there wes a man in Muirtown ‘at cud dae mair for her, a’ ‘d have him this verra nicht; but a’ the doctors in Perthshire are helpless for this tribble.

“Tammas, ma puir fallow, if it could avail, a’ tell ye a’ wud lay doon this auld worn-oot ruckle o’ a body o’ mine juist tae see ye baith sittin’ at the fireside, an’ the bairns round ye, couthy an’ canty again; but it’s nae tae be, Tammas, it’s nae tae be.”

“When a’ lookit at the doctor’s face,” Marget said, “a’ thocht him the winsomest man a’ ever saw. He wes transfigured that nicht, for a’ ‘m judgin’ there’s nae transfiguration like luve.”

“It’s God’s wull an’ maun be borne, but it’s a sair wull fur me, an’ a’ ‘m no ungratefu’ tae you, doctor, for a’ ye’ve dune and what ye said the nicht,” and Tammas went back to sit with Annie for the last time.

Jess picked her way through the deep snow to the main road, with a skill that came of long experience, and the doctor held converse with her according to his wont.

“Eh, Jess, wumman, yon wes the hardest wark a’ hae tae face, and a’ wud raither hae taen ma chance o’ anither row in a Glen Urtach drift than tell Tammas Mitchell his wife wes deein’.

“A’ said she cudna be cured, and it was true, for there’s juist ae man in the land fit for ‘t, and they micht as weel try tae get the mune oot o’ heaven. Sae a’ said naethin’ tae vex Tammas’s hert, for it’s heavy eneuch withoot regrets.

“But it’s hard, Jess, that money will buy life after a’, an’ if Annie wes a duchess her man wudna lose her; but bein’ only a puir cotter’s wife, she maun dee afore the week ‘s oot.